மூன்றாவது திருவழிபாடு ஆண்டு
பொதுக்காலம் 17வது வாரம் திங்கட்கிழமை
2016-07-25

புனித யாக்கோபு - திருத்தூதர்விழா

முதல் வாசகம்

சகோதரர் சகோதரிகளே, கடவுளின் மாட்சியாகிய செல்வத்தை மண்பாண்டங்கள் போன்ற நாங்கள் கொண்டிருக்கிறோம். இந்த ஈடு இணையற்ற வல்லமை எங்களிடமிருந்து வரவில்லை, அது கடவுளுக்கே உரியது என்பது இதிலிருந்து விளங்குகிறது. நாங்கள் எல்லாச் சூழ்நிலைகளிலும் இன்னலுற்றாலும் மனம் உடைந்துபோவதில்லை; குழப்பமுற்றாலும் நம்பிக்கை இழப்பதில்லை; துன்புறுத்தப்பட்டாலும் கைவிடப்படுவதில்லை; வீழ்த்தப்பட்டாலும் அழிந்துபோவதில்லை. இயேசுவின் வாழ்வே எங்கள் உடலில் வெளிப்படுமாறு நாங்கள் எங்குச் சென்றாலும் அவருடைய சாவுக்குரிய துன்பங்களை எங்கள் உடலில் சுமந்து செல்கிறோம். இயேசுவின் வாழ்வு சாவுக்குரிய எங்கள் உடலில் வெளிப்படுமாறு உயிரோடு இருக்கும்போதே நாங்கள் அவரை முன்னிட்டு எந்நேரமும் சாவின் வாயிலில் நின்றுகொண்டிருக்கிறோம். சாவின் ஆற்றல் எங்களிலும் வாழ்வின் ஆற்றல் உங்களிலும் வெளிப்படுகிறது. ``நான் கடவுள்மீது நம்பிக்கையோடு இருந்தேன்; ஆகவே பேசினேன்'' என்று மறைநூலில் எழுதியுள்ளது. அதற்கொப்ப நம்பிக்கை மனப்பான்மை கொண்டுள்ள நாங்களும் நம்புகிறோம்; ஆகவே பேசுகிறோம். ஆண்டவர் இயேசுவை உயிர்த்தெழச் செய்த கடவுளே எங்களையும் அவரோடு உயிர்த்தெழச் செய்து அவர் திருமுன் நிறுத்துவார்; உங்களையும் அவ்வாறே நிறுத்துவார் என்பது எங்களுக்குத் தெரியும். இவை அனைத்தும் உங்கள் நன்மைக்கே நிகழ்கின்றன. இறையருள் பெறுவோரின் தொகை பெருகப் பெருக அவர்கள் கடவுளுக்குச் செலுத்தும் நன்றியும் பெருகும். இதனால் கடவுள் போற்றிப் புகழப்படுவார்.

- இது ஆண்டவர் வழங்கும் அருள்வாக்கு.

- இறைவா உமக்கு நன்றி

பதிலுரைப் பாடல்

1 சீயோனின் அடிமை நிலையை ஆண்டவர் மாற்றினபோது, நாம் ஏதோ கனவு கண்டவர் போல இருந்தோம். 2யb அப்பொழுது, நமது முகத்தில் மகிழ்ச்சி காணப்பட்டது. நாவில் களிப்பாரவாரம் எழுந்தது. பல்லவி

2உன ``ஆண்டவர் அவர்களுக்கு மாபெரும் செயல் புரிந்தார்'' என்று பிற இனத்தார் தங்களுக்குள் பேசிக்கொண்டனர். 3 ஆண்டவர் நமக்கு மாபெரும் செயல் புரிந்துள்ளார்; அதனால் நாம் பெருமகிழ்ச்சியுறுகின்றோம். பல்லவி

4 ஆண்டவரே! தென்னாட்டின் வறண்ட ஓடையை நீரோடையாக வான்மழை மாற்றுவது போல, எங்கள் அடிமை நிலையை மாற்றியருளும். 5 கண்ணீரோடு விதைப்பவர்கள் அக்களிப்போடு அறுவடை செய்வார்கள். பல்லவி

6 விதை எடுத்துச் செல்லும்போது - செல்லும்போது - அழுகையோடு செல்கின்றார்கள்; அரிகளைச் சுமந்து வரும்போது - வரும்போது - அக்களிப்போடு வருவார்கள். பல்லவி

நற்செய்திக்கு முன் வாழ்த்தொலி

நற்செய்தி வாசகம்

அக்காலத்தில் செபதேயுவின் மனைவி தம் மக்களோடு ஒரு வேண்டுகோள் விடுக்குமாறு இயேசுவிடம் வந்து பணிந்து நின்றார். ``உமக்கு என்ன வேண்டும்?'' என்று இயேசு அவரிடம் கேட்டார். அவர், ``நீர் ஆட்சி புரியும்போது என் மக்களாகிய இவர்கள் இருவருள் ஒருவன் உமது அரியணையின் வலப்புறமும் இன்னொருவன் இடப்புறமும் அமரச் செய்யும்'' என்று வேண்டினார். அதற்கு இயேசு, ``நீங்கள் என்ன கேட்கிறீர்கள் என உங்களுக்குத் தெரியவில்லை. நான் குடிக்கப்போகும் துன்பக் கிண்ணத்தில் உங்களால் குடிக்க இயலுமா?'' என்று கேட்டார். அவர்கள், ``எங்களால் இயலும்'' என்றார்கள். அவர் அவர்களை நோக்கி, ``ஆம், என் கிண்ணத்தில் நீங்கள் குடிப்பீர்கள். ஆனால் என் வலப்புறத்திலும் இடப்புறத்திலும் அமரும்படி அருளுவதோ எனது செயல் அல்ல; மாறாக அவ்விடங்களை என் தந்தை யாருக்கு ஏற்பாடு செய்திருக்கிறாரோ அவர்களுக்கே அவை அருளப்படும்'' என்றார். இதைக் கேட்டுக் கொண்டிருந்த பத்துப்பேரும் அச்சகோதரர் இருவர் மீதும் கோபங்கொண்டனர். இயேசு அவர்களை வரவழைத்து, ``பிற இனத்தவரின் தலைவர்கள் மக்களை அடக்கி ஆளுகின்றார்கள். உயர்குடிமக்கள் அவர்கள்மீது தங்கள் அதிகாரத்தைக் காட்டுகிறார்கள்; இதை நீங்கள் அறிவீர்கள். உங்களிடையே அப்படி இருக்கக்கூடாது. உங்களுள் பெரியவராக இருக்க விரும்புகிறவர் உங்கள் தொண்டராய் இருக்கட்டும். உங்களுள் முதன்மையானவராக இருக்க விரும்புகிறவர் உங்களுக்குப் பணியாளராக இருக்கட்டும். இவ்வாறே மானிடமகனும் தொண்டு ஏற்பதற்கு அல்ல, தொண்டு ஆற்றுவதற்கும் பலருடைய மீட்புக்கு ஈடாகத் தம் உயிரைக் கொடுப்பதற்கும் வந்தார்'' என்று கூறினார்.

- இது கிறிஸ்து வழங்கும் நற்செய்தி.

- கிறிஸ்துவே உமக்கு புகழ்.

இன்றைய சிந்தனை

''இயேசு, 'பிற இனத்தவரின் தலைவர்கள் மக்களை அடக்கி ஆளுகிறார்கள். உயர்குடி மக்கள் அவர்கள்மீது தங்கள் அதிகாரத்தைக் காட்டுகிறார்கள்... உங்களிடையே அப்படி இருக்கக் கூடாது. உங்களுள் பெரியவராக இருக்க விரும்புகிறவர் உங்கள் தொண்டராய் இருக்கட்டும்' என்றார்'' (மத்தேயு 20:25-26)

பிறர் முன்னிலையில் தம்மைப் பெரியவராகக் காட்டவேண்டும் என்னும் சோதனை மனிதருக்கு ஏற்படுவதுண்டு. இச்சோதனையை வெல்லும் வழி யாதென இயேசு நமக்குக் காட்டுகிறார். அதாவது, ''உங்களுள் பெரியவராக இருக்க விரும்புகிறவர் உங்கள் தொண்டராய் இருக்கட்டும்'' என்பது இயேசு நமக்கு வழங்கும் அறிவுரை (மத் 20:26). இயேசுவை நெருக்கமாகப் பின்சென்றவர்கள் ''அப்போஸ்தலர்கள்'' என அழைக்கப்படுகின்ற பன்னிரு ''திருத்தூதர்கள்''. இவர்களுக்கிடையே ''யார் பெரியவர்'' என ஒரு பெரிய போட்டியே எழுகிறது. யாக்கோபு, யோவான் ஆகியோரின் தாய் இயேசுவிடம் சென்று தம் மக்கள் இருவரும் இயேசுவின் ஆட்சியில் முக்கிய இடம் பெற வேண்டும் என்று கேட்டதாக மத்தேயு குறிப்பிடுகிறார் (மத் 20:20-21). யாக்கோபும் யோவானும் நேரடியாகவே இயேசுவிடம் கேட்டதாக மாற்கு எழுதுகிறார் (மாற் 10:35-37). பதவியும் அந்தஸ்தும் ஒருவரைப் பெரியவராக்குவதில்லை என இயேசு தம் சீடர்களுக்குக் கற்பிக்கிறார். பிறரை ''அடக்கி ஆளலாம்'' என நினைக்காமல் ''தொண்டுசெய்ய'' யார் முன்வருகிறார்களோ அவர்களே உண்மையில் ''பெரியவர்கள்'' (மத் 20:25-26). தொண்டராக செயல்படுவது எப்படி என்பதையும் இயேசுவே தம் வாழ்வில் காட்டினார். இறுதிவரை பிறருக்காக வாழ்வதும் பிறர் நன்மைக்காக இறப்பதற்கும் தயாராக இருப்பதும்தான் தொண்டரின் பண்பு.

இயேசு தொண்டு ஆற்ற வந்தாரே ஒழிய தொண்டு ஏற்பதற்கல்ல (மத் 20:28). அவர் ''பலருடைய மீட்புக்கு ஈடாகத் தம் உயிரைக் கொடுப்பார்'' (மத் 20:28). இங்கே ''பலர்'' என்பது எபிரேயத்தில் ''எல்லாரும்'' எனப் பொருள்படும். அதாவது, உலக மக்கள் அனைவரும் மீட்புப் பெற வேண்டும் என்பதற்காக இயேசு தம் உயிரையே பணயமாக்குகிறார். அக்காலத்தில் அடிமைகள் விடுதலை பெற வேண்டும் என்றால் அதற்கு ஒரு தொகை கட்டவேண்டும். இயேசு தம் உயிரையே பணயத் தொகையாகக் கொடுத்து நம்மைப் பாவத்திலிருந்தும் சாவிலிருந்தும் விடுவிக்கிறார் என்பது பொருள். இன்று நாம் இயேசுவைப் போலத் தொண்டாற்ற அழைக்கப்படுகிறோம். பதவியையும் புகழையும் நமக்கென்று தேடாமல், ஒடுக்கப்பட்டோர் உரிமை வாழ்வு பெற வேண்டும் என்பதற்காக நம்மையே அர்ப்பணிக்கின்ற ''தொண்டு'' மனப்பான்மை நம்மில் வளர வேண்டும்.

மன்றாட்டு:

இறைவா, பிறர் உயர நாங்கள் உழைத்திட அருள்தாரும்.